Казанда «Нуриев сезоннары» халыкара мәдәни проектының ябылу тантанасы узды

Узган якшәмбедә «Мир» кинотеатрында «Нуриев сезоннары» халыкара мәдәни проектының ябылу тантанасы узды.

«Без «Нуриев сезоннары»н биш көн Мәскәүдә һәм биш көн Уфада төрле мәйданнарда күрсәттек. Казанда барлык фильмнар бер урында – «Мир» кинотеатрында тәкъдир ителде, һәркөнне заллар тулы иде. Мондый гаҗәп күренешкә беренче тапкыр тап булдык», - дип проектны оештыручы Әлфия Чеботарева тамашачыларга рәхмәтен белдерде. «Сездән якташыгыз Рудольф Нуриевка карата мәхәббәт һәм хөрмәт хисе бөркелеп тора, аерылышасы бер дә килми» - диде ул.

«Нуриев сезоннары» проектын ябу тантанасында Европадан килгән кунак – грек-италия рәссамы, дизайнер, зәрканчы, Нуриевның дусты Лиза Сотилис чыгыш ясады. Проект артыннан күзәтеп барган казанлылар аның белән берничә тапкыр күрешеп, сораулар бирә алдылар – ханым матбугат конференциясендә һәм «Мир» кинотеатрында очрашуларда катнашты. Тамашачыларның барысы да әлеге үткен фикерле, алдынгы карашлы кунакны якын иттеләр. Ул – проект кысаларында чакырылган чит ил сәнгате легендаларының берсе. Россиягә Сотилис беренче тапкыр килде һәм илнең өч шәһәрендә – Мәскәү, Уфа һәм Казанда кунак булды.

Тамашачыларның: « Казан ничек сезгә? Шәһәрнең тышкы кыяфәтендә һәм архитектурасында нәрсә ошады? » - дигән сорауларына: «Мин архитектурадан канәгатьлек хисе алдым, Греция белән бик күп охшашлыклар таптым. Һәр җирдә татар колориты чагыла. Барысы да ошады – Кремль дә, Татар бистәсе дә, Милли музей да».


Нуриев турында сөйләгәндә, рәссам: «Рудольф Нуриев – күктән иңдерелгән яктылык, хәер-фатиха ул. Аның тырышлыгы белән, дөньяда кешеләр рус мәдәнияте белән кызыксына башлады. Мәдәният һәм сәнгать сәясәттән югарырак», - дип әйтте.

«Татаркино» директоры Миләүшә Айтуганова Казанга килү истәлеге итеп, Лиза Сотилиска рәссам Фәрит Хәкимуллинның «Иске Татар бистәсе» картинасын бүләк итте һәм: «Мондый очрашулар кунакларны да, кунак итүчеләрне дә рухи яктан баета. Әлфия Чеботарева өчен бу проект – тормышчан миссия», - диде.

«Нуриев сезоннары» халыкара мәдәни проекты Казан шәһәре администрациясе, Татарстан Мәдәният министрлыгы, «Татаркино» мәдәният учреждениесе, Россиядә Италия телен популярлаштыручы PRIA программасы, «Джузеппе» кунакханәсе һәм «Мәдәният волонтерлары» программасы ярдәмендә узды.

Подпишитесь на рассылку
Получайте последние новости и будьте в курсе
грядущий событий