«Милли мультfest» республика балалар кинофестивален үткәрү кысаларында, 12-18 декабрь көннәрендә «Байтик» шәһәрарты компьютер лагерында «IT-Fresh» дип исемләнгән махсус профильле смена уза. 17 декабрь көнне катнашучылар смена барышында башкарган эшләрен якладылар. «IT-Fresh» - «Милли мультfest» фестиваленең башкарма дирекциясе һәм «Байтик» балаларны сәламәтләндерү-белем бирү комплексы белгечләре белән берлектә булдырылган, 7 яшьтән алып 17 яшькә кадәрге балалар өчен әзерләнгән 1 атналык профильле смена.

 «IT-Fresh» сменасының төп максатлары: мәгълүмати технологияләр өлкәсендә сәләте булган балаларны ачыклау, аларга ярдәм күрсәтү; укучыларның иҗади активлыгын стимуллаштыру; татарча анимация, компьютер уеннары, кыскаметражлы фильмнар белән шөгыльләнүче укучыларга «Милли мультfest» республика балалар кинофестиваленә эшләр хәзерләүдә булышу, аларга теоретик һәм практик белемнәр бирү.

 Әлеге сменада республиканың төрле районнарыннан 94 укучы катнашты. Аларга Казан Дәүләт Мәдәният институтының кино һәм телевидение режиссурасы кафедрасы мөгаллимнәре – «Татармультфильм» анимацион студиясенең баш режиссеры, мультипликатор Сергей Киатров, режиссер Юлия Захарова, Зөфәр Хәйруллин теоретик, практик белемнәрне туплаган мастер-класслар күрсәттеләр, ә студентлар сменаның вожатыйлары булып эшләделәр, балаларга тәүге иҗат җимешләрен ясауда зур булышлык күрсәттеләр.

 Сменада катнашкан укучылар 26 командага бүленеп 3 юнәлеш буенча эш алып барды: татарча компьютер уеннары, татарча анимацион фильмнар, татарча кыскаметражлы фильмнар. Профильле смена эшчәнлеге нәтиҗәсе буларак, 17 декабрь көнне укучыларның проект эшләрен яклау чарасы узды. Алар смена барышында башкарган эшләрен «Милли мультfest» республика балалар кинофестиваленә тәкъдим иттеләр. Әлеге чарада Татарстан Республикасы Дәүләт Советы депутаты, ТР Президенты каршындагы Татар телен саклау һәм үстерү мәсьәләләре комиссиясе әгъзасы, фестивальнең сәнгать җитәкчесе һәм жюри рәисе Рамил Төхвәтуллин, фестивальнең башкарма дирекциясе «Татаркино» оешмасы директоры Миләүшә Айтуганова, «Татармультфильм» анимацион студиясенең баш режиссеры, мультипликатор Сергей Киатров, язучы, драматург, режиссер Салават Юзеев, Республика балалар китапханәсе директоры Ирина Мөхәммәтгәрәева, «Байтик» лагеры директоры Лариса Бикмуллина, Казан Дәүләт Мәдәният институты доценты Азат Зарипов катнашты. Командалар үз эшләрен зур экранда күрсәтеп кенә калмады, таныштырып һәм аңлатмалар да биреп барды.

Фестивальнең төп шарты – барлык эшләрнең татар телендә булуы. Проектларны яклау чарасында 10 эш тәкъдим ителде: шуларның 6сы – анимацион фильм, 2се – татарча компьюьтер уены, тагын 2се – кыскаметражлы фильм. Укучыларның эшләрендә Шүрәлене һәм Су Анасын, чәк-чәк, өчпочмак, Сабантуй күренешен, түбәтәй, калфак, татар чәен күрергә мөмкин иде.

 «Кыска гына вакыт эчендә башкарган эшләрегез искиткеч. Бүгенге мизгелдән Сез барыгыз да «Милли мультfest» республика балалар кинофестиваленең катнашучылары,» - диде Миләүшә Айтуганова. Рамил Төхвәтуллин фикеренчә, «Милли мультfest» кинофестивале киләчәктә татар мультимедиа контентын арттырырга этәргеч бирәчәк. Үз чиратында, ул фестивальнең финалына үткән балаларга Казанны күрсәтергә сүз бирде һәм ярышта уңышлар теләде.

 «Байтик» компьютер лагерында заманча технологияләр, анимация, видео төшерү һәм монтаж ясау өчен барлык шартлар булдырылган. Биредә замана белән бергә атлау рухы хөкем сөрә. «Байтик» лагеры директоры Лариса Бикмуллина фестивальне оештыручыларга лагерьга татар телен «алып килгән»нәре өчен рәхмәт белдерде һәм киләчәктә дә уртак хезмәттәшлекнең дәвамлы булуын теләде.

 «Милли мультfest» республика балалар кинофестиваленә гаризалар кабул итү 30 гыйнварга кадәр дәвам итә.