14 апрельдә "Мир" кинотеатрында татар шагыйре Габдулла Тукайның тууына 140 ел тулуны билгеләп үтү елында "Шүрәле" балетының кино версиясе премьерасы узды.

"Россия-Культура" телеканалы һәм Муса Җәлил исемендәге Татар  академия дәүләт опера һәм балет театры белән бергә булдырылган бу истәлекле проект милли сәнгатьне киң аудиториягә тәкъдим итү тарихында яңа сәхифәне ача.

Премьераны Россия һәм Татарстан Республикасының атказанган артисты, театр балет труппасының сәнгать җитәкчесе Владимир Яковлев тәкъдим итте: "Шүрәле - Татарстанда балет сәнгатен үстерүгә этәргеч биргән беренче спектакль". Аның сүзләренчә, «Театр в кино» проекты - искиткеч идея, һәм кино версияләр ярдәмендә милли театрның шедеврлары бөтен ил буйлап тамашачыларга ачыла, географик киртәләрне җиңеп, балалар һәм өлкәннәр өчен балет дөньясын ача.

Театрның премьеры, Татарстанның атказанган артисты Антон Полодюк Былтыр партиясен башкарган, роле турындагы хатирәләре белән уртаклашты: "Хореография училищесын тәмамлагач, театрда ике ел эшләгәннән соң, мин Былтыр партиясен биедем. Бу минем беренче әйдәп баручы партиям, һәм ул минем белән гомерлеккә калды".

Режиссер Вадим Киселев балетны төшерү һәм кино версиясен булдыру нечкәлекләре турында сөйләде. Ул ассызыклаганча, зур экран хаталарны кичерми, артистларны мөмкин кадәр күп эшләргә мәҗбүр итә. Төшерү гадәттә ике көн дәвам итә. Тамашачылар белән булган көнгә күбрәк өстенлек бирелә, чөнки артистлар бу көнне зал реакциясен сизеп эшлиләр.

Вадим Киселев кино төшерүнең кызыклы мизгеле белән уртаклашты: туй сәхнәсе вакытында, кәләш кыз Сөембикәне тәкъдим иткәндә, аңа чын күбәләк утыра. Бу мизгел зур экранда бик яхшы күренә, бөтен сәхнәгә үзенчәлекле әкияти бер тылсым өстәлә.

Муса Җәлил исемендәге Татар академия дәүләт опера һәм балет театры репертуарының энҗесе булган "Шүрәле" инде Россия прокатында.