Узган якшәмбедә Чаллыда "Татармультфильм" студиясенең баш режиссеры Сергей Киатров анимацион фильмнар ясау тәҗрибәсе белән уртаклашты. Ул компьютер графикасы һәм анимация өлкәсендә 200 дән артык проектны тормышка ашырган, шуларның 50 сен "Татармультфильм" студиясендә. Габдулла Тукай шигыренә нигезләнгән "Кисекбаш" фильмы «Харьковская сирень» халыкара фестивалендә беренче урынга лаек була. 2012 елда "Татар әкиятләре" мультфильмнар сериясе өчен Сергей Киатровка Халыкара төрки мәдәният оешмасының Махсус бүләге тапшырылды. Ә тулы метражлы «Стрела наследия» анимацион фильмы Суздальдәге Бөтенроссия ачык анимацион кино фестивалендә "Милли анимация үсеше өчен" дипломына лаек була. Казан халыкара "Алтын минбар" кинофестивалендә Сергей Киатровның "Зилант әкиятләре" трилогиясе "Иң яхшы анимацион фильм" номинациясендә беренче урынны алды.
Мультипликация булдыру серләрен һәм ысулларын үзләштерүгә ТР ДБМУ "Татаркино" филиалы залына балаларны анимация дөньясына җәлеп итүче укытучылар, тәрбиячеләр, сәнгать мәктәпләре һәм студия җитәкчеләре, режиссерлары җыелды. Алар шулай ук ел саен "МиллимультFest" республика балалар кинофестивалендә катнаша.
Сергей Киатров үзенең "10 көн эчендә анимацион фильм ясау" мастер-классында мультфильмнар ясау "кухнясы" белән таныштырды, иҗади проект өстендә эшнең ничек башлануы һәм мультфильмнарда нәрсәдән тотынырга һәм нәрсә турында сөйләве турында аңлатты. Аның сүзләренчә, хәтта иң гадәти күренгән нәрсә яки әйбер дә бай фантазия һәм сәнгать таланты ярдәме белән анимацион фильмга туры килүче объект булырга мөмкин.
Мастер-класста катнашучыларның барысы да, хәзер "МиллимультFest" республика конкурсына анимацион картиналар ясау буенча интенсив эш бару сәбәпле, әлеге очрашуның аеруча файдалы булуын билгеләп үттеләр.
"Зур рәхмәт сезгә. Мастер-класстан уңай хисләр калды. Сезнең аша Дөнья иҗат өчен ачык булуын, анимациянең безгә якын булуын белү бик сөенечле. Ә мондый чара безнең Чаллыда булу - ниндидер могҗиза!" - дип уртаклашты Ләйлә Равилова, 101 нче "Щелкунчик" балалар бакчасы тәрбиячесе (Яр Чаллы шәһәре).
"Мультфильмнар ясау буенча эчтәлекле һәм мавыктыргыч мастер-класс үткәргәнегез өчен чын күңелдән рәхмәтемне белдерәм. Алынган практик күнекмәләр, анимация процессына чуму һәм заманча технологияләр белән танышу яңа иҗади идеяләргә илһам бирде. Сезгә алга таба да һөнәри уңышлар, илһам телим!" – диде 127 нче «Друзья» балалар бакчасында (Яр Чаллы) туган телне өйрәтүче тәрбияче Ләйсән Ханнанова.
Балалар иҗаты фестивале барышында мондый мастер-класслар уздыру традициясе инде күп еллар дәвамында бара. Исегезгә төшерәбез, 2026 елның 10 ноябренә кадәр "Милли мультFest" VI Республика кинофестивалендә катнашу өчен гариза бирергә мөмкин. Фестиваль ике юнәлешне үз эченә ала: "Татар телендә анимацион фильмнар" һәм "Татар телендә балалар өчен кыска метражлы фильмнар". Конкурста 7 яшьтән 17 яшькә кадәрге балалар яки иҗат коллективлары катнаша ала. Катнашучылардан төрле техникада башкарылган эшләр - пластилин, кәгазь анимация, шулай ук заманча графика кабул ителә.
Фестивальнең төп вакыйгасы 2026 елның 5 декабрендә Казанда, "Мир" кинотеатрында узачак бүләкләү тантанасы булачак. Иң яхшы әсәрләр призлар белән бүләкләнәчәк, ә аларның авторлары профессиональ җәмәгатьчелек тарафыннан танылу алачак.
