Һәр якшәмбе Бакуда татар җәмәгатьчелеге Татарстанның архив киноларын карау белән җанлана. Бу инициатива Гаделшин Мурад Асфандиар улы җитәкчелегендәге Татарстан Республикасының Әзербайҗан Республикасындагы Даими вәкиллеге белән ТР ДБМУ "Татаркино" хезмәттәшлеге нәтиҗәсендә мөмкин булды.

Якшәмбе көннәрендә 2025 ел ахырына кадәр кинозалда 2000 елдан 2021 елга кадәр Татарстанда җитештерелгән 15 фильм күрсәтеләчәк. Тамашачылар драмалардан һәм җиңел комедияләрдән алып һәрберсе татар җанының бер өлешен үз эченә алган тәэсирле мелодрамаларга кадәр төрле жанрлардагы картиналар белән хозурлана алачак.

Милли театр белән таныш әзербайҗан татарлары өчен легендар татар актерлары төшкән фильмнар күңелләрен сөендерәчәк. Мәсәлән, "Бөркетләр" фильмында халык артистлары Әзһәр Шакиров, Ринат Таҗетдинов, Равил Шәрәфиев катнашты.

Күрсәтеләчәк фильмнар арасында "Әпипә" (2019, режиссеры И.Рәхимбай), "Мулла" (2018, режиссерлары Р.Фазлыев, А.Галиаскәров), "Сөмбел" (2020, режиссерлары Р.Мәликов, Р.Фазлыев, Россия (Татарстан) копродукциясе), "Тарлан"(2021, режиссеры Ю. Захарова, (Татарстан) Казахстан копродукциясе), "Без – 41 ел балалары” (2021, режиссер А.Галиаскәров) бар.

Вәкиллекнең төп бурычларының берсе - татар диаспорасы белән элемтәләрне ныгыту. Әзербайҗанда яшәүче татарлар өчен кино күрсәтү - кино карау гына түгел, ә туган тел һәм мәдәният атмосферасында булу, ватандашлар белән очрашу мөмкинлеге. Фильмнарны караганнан соң, алар милли ризыклар белән өстәл артында фикер алышалар, татарча җырлыйлар һәм ата-бабалары белән бәйләнешләрен ныгыталар.